MBUNGE WA CHADEMA APANULIWA MIGUU NA KUUMIZWA SEHEMU ZA SIRI NA WAFUASI WA CCM.

Mbunge wa Viti Maalum wa Chadema, Rose Kamili amedai kupigwa na kufanyiwa vitendo vya udhalilishaji na wafuasi wa Chama cha Mapinduzi (CCM) wakati walipomkamata na kumshikilia kwa muda kwa tuhuma za kutoa rushwa. 

 

Mbunge huyo kwa sasa amelazwa Hospitali ya Rufaa ya Iringa akitibiwa majeraha yake na mwenyekiti wa Chadema, Freeman Mbowe amesema kwa sasa wanasubiri taarifa ya uchunguzi ili kuamua kama ahamishiwe Hospitali ya Taifa ya Muhimbili au KCMC.

 

“Wamenipiga, wamenidhalilisha vya kutosha,” alisema mbunge huyo huku akitokwa na machozi. “Walipanua miguu yangu na kunikanyaga sehemu za siri. Kama angekuwa mwanamume sijui angekuwa katika hali gani?”
 

Alisema vitendo hivyo vilifanywa na walinzi wa CCM, wanaojulikana kwa jina la Green Guard, ndani ya ofisi ya chama hicho Mkoa wa Iringa na vilishuhudiwa na Mwenyekiti wa CCM wa Iringa, Jesca Msambatavangu.
 

Muda mfupi baada ya kuachiwa kwa dhamana, Kamili aliliambia  Gazeti la Mwananchi  kwamba wafuasi wa CCM walimteka wakati akitoa maelekezo kwa mawakala wa Chadema waliokuwa wamepangwa kusimamia uchaguzi mdogo katika Jimbo la Kalenga.
 

Mbunge huyo alisema aliporwa Sh350,000, Pauni 500 za Uingereza, simu mbili; moja aina ya Nokia na nyingine Samsung, pamoja na nakala 16 za daftari la wapigakura ambazo walikuwa wapewe mawakala waliokuwa kwenye mkutano.
 

Wakati kukiwa na tuhuma utekaji uliofanywa na wafuasi wa CCM, Msambatavangu alikiri jana kuwa chama hicho tawala kilimshikilia kwa lengo la kumuhifadhi hadi polisi walipofika, lakini akakanusha madai ya kuhusika kwa wafuasi wa CCM katika tukio hilo.
 

“Siyo kweli. Ni madai ya uongo na kama anadai hivyo tusubiri uchunguzi wa polisi ili ukweli ujulikane,” alisema Msambatavangu.
 

Kamanda wa Polisi wa Iringa, Ramadhani Mungi alikiri kuwa polisi walimkuta Kamili kwenye ofisi za CCM za mkoa na kwamba waliondoka naye baada ya kupewa taarifa na makada wa chama hicho kwamba alikutwa akitoa fedha.
 

“Askari wetu waliokuwa kwenye msafara wa mgombea wa CCM waliporudi, maana ilikuwa jioni, walimkuta huyo mtuhumiwa akiwa kwenye ofisi za chama hicho ndipo walipompeleka kituoni,” alisema.
 

“Tuliambiwa amekutwa akitoa rushwa, lakini alipofika kituoni naye akadai kwamba alitekwa, kupigwa na kudhalilishwa. Sasa tumefungua majalada ya kuchunguza tuhuma zote mbili – suala la rushwa na madai yake ya kutekwa.”
 

Kamanda Mungi alisema polisi hawafahamu mbunge huyo alikaa kwa muda gani kwenye ofisi za CCM kabla ya wao kumchukua.

Kuhusu ushiriki wa Taasisi ya Kuzuia na Kupambana na Rushwa (Takukuru) katika suala hilo, Mungi alijibu: “Kazi ya polisi ni ya polisi na ya Takukuru ni ya Takukuru, kama unataka kujua kuhusu wao pengine ukawaulize.”
 

Hata hivyo, Kamanda wa Takukuru wa Mkoa wa Iringa, Emma Kuhanga aliwaongoza maofisa wake kwenda polisi kuitika wito wa Kamanda Mungi aliyewaarifu kuwepo kwa mtu aliyekamatwa kwa rushwa.
 

Jana Kamanda Kuhanga alikiri kuitwa polisi lakini akasema: “Ndiyo tulikwenda polisi, lakini tumeshindwa kushiriki kwenye mchakato wa tuhuma hizo kwa sababu hatukupata maelezo yanayoeleweka.”

 

Alazwa hospitali

Naye Mkuu wa Mkoa wa Iringa, Dk. Christine Ishengoma jana alizuiwa na walinzi wa Chadema kumwona Kamili alipokwenda kumjulia hali hospitalini.
 

Kuhusu tuhuma za rushwa, Msambatavangu alisema wanakijiji waliizingira nyumba ambayo walihisi kwamba Kamili alikuwa akigawa fedha na kuivamia kwa lengo la kuwakurupusha.
 

“Kwa kuwa baadhi ya vijana wetu walikuwa eneo hilo, sisi tulichukua jukumu la kumpandisha haraka kwenye gari letu na tulikimbia haraka maana tungemwacha pale wananchi wangemuumiza,” alisema Msambatavangu ambaye alisema gari la Chadema lilifika eneo hilo na kuzuia njia lakini wakafanikiwa kuondoka naye. ambaye alisema kundi la wafuasi wa CCM wakiongozwa na Green Guard walivamia mkutano wa ndani wa Chadema ambao ulikuwa ukiwapa mawakala maelekezo jinsi ya kusimamia uchaguzi.
 

“Walikuwa wamemlenga mbunge yaani mimi, walipotuvamia ilizuka taharuki na kunibeba na kunipandisha kwenye gari kwa nguvu, ndani ya gari walikuwa wanaume tu na idadi yao ilikuwa ni 13,” alisema Kamili na kuongeza:
 

“Wakati gari linataka kuondoka, gari letu la M4C lilizuia njia, na waliokuwa ndani ya gari waliambizana kwamba pita porini hata tukipata ajali sawa tu…wakapita porini na walikimbia sana hadi CCM mkoa ambako walianza kunitesa”.
 

Mbunge huyo alisema walipokuwa wakimpiga walikuwa wakisema kwamba lazima wawakomeshe wabunge wa Chadema. “Waliniuliza umekuja kufanya nini huku, kwani huku ni kwenu Manyara?...wakasema lazima tuwakomeshe wabunge wa Chadema na hata kama ni kuua mmoja ili mkome”.
 

Kamili alisema aliokolewa na polisi ambao walifika katika ofisi hizo na kumchukua kwa mahojiano ambayo yalifanyika hadi saa 6:09 usiku wa kuamkia jana.

 

 

 

>>Mwananchi